Төсвийг мөшгөе: Баянбүрдийн шатсан хөшөөний оронд дөрвөн замын уулзвар байгуулах зураг төслийг 318 сая төгрөгөөр хийлгэнэ

Төсвийн мөнгийг хэрэгтэй, хэрэггүй тендерт хэрэглэдэг гэдгийг хэн бүхэн мэднэ. Тэгвэл хэрхэн зарцуулагдаж байгаа талаар бид цувралаар хүргэдэг. Энэ удаад шатсан Баянбүрдийн тойргийн Баганат хөшөөний оронд дөрвөн замын уулзвар байгуулахаар болжээ. Энэхүү тойрог уулзварын зураг төслийг 318 сая төгрөгөөр хийлгэхээр тендер зарлагджээ.

Уг тендерийг Нийслэлийн худалдан авах ажиллагааны газраас зарлажээ. Харин  Чингэлтэй дүүрэг хариуцан ажиллах юм байна. Нэгдүгээр сар хүртэл тендерийг нээлттэй зарласан бөгөөд эхний удаад зураг төслөө ийнхүү гаргуулж авахаар болжээ.

Тус хөшөө хэрхэн шатсан бэ? Өнгөрсөн аравдугаар сарын 15-ны 05:43 цагт Цагдаагийн байгууллагад Чингэлтэй дүүргийн 9-р хороо “Баянбүрдийн тойргийн хөшөө шатаж байна гэх мэдээлэл ирсэн байдаг.  Ийнхүү хэргийг хүлээн авч шалгахад иргэн М архи согтууруулах ундааны хэрэглэсэн үедээ тойргийн голд “Чингэлтэй дүүрэг” гэсэн бичиглэл бүхий хөшөөний доор гал түлснээс болж хөшөө шатсан байдаг.  Энэхүү нийслэл, дүүргийн өмчийг шатаасан М нь төлбөрийн чадваргүй, орон гэргүй нэгэн байжээ. Төлбөрийн чадамжгүй тул өнөөг хүртэл хохиролыг барагдуулж чадаагүй байгаа юм. 

Шатсан Баганат хөшөөг 1997 оны есдүгээр сарын 17-ны өдөр албан ёсоор нээсэн бөгөөд газрын гүнээс урган бадарсан мөнгөн багана, түүний оройд Монгол төрийн сүлдийг дээдлэн залж, дүүргийн бэлгэдэл тэмдгийг алтан шаргал өнгөөр урлан бүтээсэн түүхтэй.

Ийнхүү нэгэн иргэн архидан согтуурч хөшөөг галдан шатаасаны улмаас өдгөө дөрвөн замын уулзвар босохоор болжээ.