Э.Болормаа: Нөлөө бүхий эрэгтэй гишүүд, дарга нар бэлгийн дарамт үзүүлвэл та хариуцлага тооцож чадах уу

Төрийн байгуулалтын байнгын хорооны өнөөдрийн хуралдаанаар Ёс зүйн дэд хорооны дарга Б.Баярбаатарыг өөрийн хүсэлтээр чөлөөлөх, түүний оронд Б.Хэрлэн гишүүнийг сонгох асуудлыг хэлэлцэн дэмжлээ. 

Энэ үеэр УИХ-ын Э.Болормаа Ёс зүй дэд хорооны даргаар сонгогдож буй Б.Хэрлэнгээс Төрийн ордон дахь ажлын байрны бэлгийн дарамттай холбоотой асуудалд ямар байр суурь баримтлан ажиллах талаар асуулаа. 

УИХ-ын гишүүн Э.Болормаа: Ордон доторх ажлын байран дахь бэлгийн дарамттай холбоотой асуудалд ямар байр суурьтай байх вэ. Энэ асуудал дээр Ёс зүйн дэд хороо яаж ажиллах ёстой гэж үзэж байна вэ. Зөвхөн ордон дотор гэхээс илүүтэй төрийн албан дахь ажлын байрны бэлгийн дарамтын талаар маш олон эмэгтэй надад хандаж байсан. Төрийн албаны зөвлөлд гомдол гаргаад ч нэмэр алга гэдэг. Таныг эмэгтэй хүнийхээ хувиар энэ асуудалд илүү манлайлал үзүүлж ажиллаасай гэж хүсэж байна. Хууль, дүрэм хэрэгжүүлэхэд анхаараарай. 

Том, том эрэгтэй гишүүд, дарга нар ийм асуудалд холбогдоход та хариуцлага тооцож чадах уу. 

УИХ-ын гишүүн Б.Хэрлэн: УИХ-ын гишүүний ёс зүйтэй холбоотой асуудал УИХ-ын гишүүний ёс зүйн дүрмийн хүрээнд цаашлаад Төрийн албан хаагчийн ёс зүйн тухай хуулиар зохицуулагддаг. Энэхүү эрх зүйн баримт бичгүүдэд ажлын байран дээрх ёс бус үйлдлийн талаар нарийн, сайн зохицуулалт туссан байдаг. Хууль, зарчмыг барьж энэ асуудалд хандах ёстой гэж бодож байна. 

Хууль, дүрэмд ийм асуудалд ямар хариуцлага тооцохоор заасан байна тэр дагуу зохих арга хэмжээг авах нь энэ албан тушаалыг хашиж байгаа хэний ч бай үндсэн үүрэг нь. 

Нөгөө талаас хууль тогтоох түвшинд ажиллаж байгаа УИХ-ын гишүүд биеэ авч явах соёлоороо үлгэрлэл, манлайлал үзүүлэх ёстой. Тиймээс энэ талын зарчмын шаардлагыг тавьж ажиллана.