Гол нэрийн барааны үнэ нэмэгдэж, махны үнэ огцом өсжээ

2025 оны 12 дугаар сарын 30-ны байдлаар гол нэрийн барааны үнэ өмнөх сараас 3.5 хувиар өсжээ. 

Тодруулбал Улаанбаатар хотод хонины ястай махны үнэ 7 хоногийн өмнөхөөс 1.6 хувиар өсөж 17.252 төгрөгт хүрсэн бол үхрийн ястай махны үнэ 2.6 хувиар өсөж 22.180 төгрөг болжээ. Харин орон нутагт хонь, үхэр, ямааны махны үнэ 0.9-2.2 хувиар өссөн бол бусад бараа бүтээгдэхүүний үнэ 0.1-1.2 хувиар нэмэгджээ.

Мөн талх, гурил, будааны бүлгийн үнэ өмнөх оны мөн үеэс 7.2 хувиар өсөхөд талх, нарийн боовны үнэ 8.5 хувиар, гоймонгийн үнэ 17 хувиар тус тус өссөн нь голлон нөлөөлсөн байна.

Улаанбаатар хотод худалдаалагдаж буй үхрийн цул нэг кг махны дундаж үнэ 2025 оны арваннэгдүгээр сард 23.955 төгрөг болж, 2023 оны арваннэгдүгээр сараас 32.8 хувиар, 2024 оны арваннэгдүгээр сараас 17.7 хувиар өсч, өмнөх сараас 1.2 хувиар буюу 303 төгрөгөөр буурсан гэж мэдээлсэн. Түүнчлэн нэгдүгээр зэргийн гурилын дундаж үнэ 2025 оны арваннэгдүгээр сард 2459 төгрөг болж, 2023 оны арваннэгдүгээр сараас хоёр хувиар, 2024 оны арваннэгдүгээр сараас 5.6 хувиар, өмнөх сараас өөрчлөлтгүй байгаа тоон статистикийг мэдээлж байв.

Тэгвэл "Хүчит шонхор" зах дээр үхрийн цул мах 25-26 мянган төгрөг, үхрийн ястай мах нь 21 мянган төгрөгийн үнэтэй худалдаалагдаж байна. Харин хонины ястай мах 18 мянган төгрөг, хонины цул мах 20 мянган төгрөгийн үнэтэй байна.

Шинэ оны өмнө тус зах дээр хонины мах 12-15 мянган төгрөг, үхрийн мах 17-20 мянган төгрөгийн үнэтэй зарж байсан юм. Он гарснаас хойш махны үнэ огцом буюу 5-6 мянган төгрөгөөр нэмэгджээ.