“Атар” хэвийн боовны барилдаанаар амжилтаа эхлүүлж улсын арслан, гарьд, заан, харцага цолтон болсон бөхчүүд

XVII жарны “Сүрээр дарагч” хэмээх гал улаан морин жилийн Сар шинийн баярыг угтан  “Талх чихэр” ХК нь “Монголын үндэсний бөхийн холбоо” болон “Монголын уртын дууны холбоо”-той  хамтран “Атар” хэвийн боовны нэрэмжит аймаг, цэргийн цолтой хүчит 256 бөхийн барилдааныг 20 дахь жилдээ зохион байгуулна. Уг барилдаанд амжилттай барилдсан бөхчүүдээс Монгол Улсын арслан-1, гарьд-2, Улсын заан– 4, Харцага-1  төрсөн байдаг. Тодруулбал,

Монгол Улсын арслан Р.Пүрэвдагва:

2011 оны Туулай жилийн сар шинийн баярыг угтсан “Атар” хэвийн боовны нэрэмжит барилдаанд  Аймгийн хурц арслан Р.Пүрэвдагва их шөвөгт шалгарсан. Улмаар 2012 оны улсын баяр наадамд тав давж “улсын начин” цол, 2016 оны улсын наадамд ес давж “Улсын арслан” цол хүртсэн.

Монгол Улсын гарьд Ш.Жаргалсайхан:

2007 оны Гал гахай жилийн сар шинийн баярыг угтсан “Атар” хэвийн боовны нэрэмжит барилдааны их шөвөгт Аймгийн арслан Ш.Жаргалсайхан шалгарсан. Улмаар 2011 оны улсын наадамд тав давж “Улсын начин” цол, 2014 оны улсын наадамд найм давж “Улсын гарьд” цол хүртсэн.

Монгол Улсын заан Б.Соронзонболд:

2006 оны Нохой жилийн сар шинийн баярыг угтсан “Атар” хэвийн боовны нэрэмжит анхны барилдаанд Аймгийн арслан Б.Соронзонболд их шөвөгт шалгарсан улмаар 2008 оны АХ-ын 87 жилийн ойн баяр наадамд далай аварга Г.Өсөхбаяраар долоо даван “Улсын заан” цол хүржээ.   

Монгол Улсын заан Н.Жаргалбаяр:

2016 оны Бич жилийн сар шинийн баярыг угтсан “Атар” хэвийн боовны нэрэмжит барилдаанд Аймгийн арслан Н.Жаргалбаяр түрүүлснээр түүний амжилтын замнал эхэлж, мөн оны улсын баяр наадамд зургаа даван “Улсын харцага” цол, 2017 оны АХ-ын 96 жилийн ойн баяр наадамд улсын аварга Г.Эрхэмбаяраар долоо даван шөвгөрч “Улсын заан” цол хүртсэн байна.

Монгол Улсын заан Т.Санчир:

2008 оны Хулгана жилийн сар шинийн баярыг угтсан “Атар” хэвийн боовны нэрэмжит барилдаанд Аймгийн арслан Т.Санчир түрүүлсэн. Улмаар 2010 оны улсын баяр наадамд тав давж “Улсын начин” цол, 2012 оны улсын баяр наадамд улсын арслан Д.Азжаргалаар зургаа давж “Улсын харцага” цол, 2013 оны улсын баяр наадамд оноолт бөх улсын арслан Х.Мөнхбаатараас сэргээш илэрсэн тул “Улсын заан” цол нөхөн олгосон.  

Монгол Улсын заан Б.Бат-Өлзий:

2015 оны Хонь жилийн сар шинийн баярыг угтсан “Атар” хэвийн боовны нэрэмжит барилдаанд  Ховд аймгийн Зэрэг сумын харьяат Аймгийн арслан Б.Бат-Өлзий түрүүлжээ. Улмаар 2016 оны АХ-ын 95 жилийн ойн баяр наадамд зургаа даван шөвгөрч “Улсын харцага” цол, 2022 оны АХ-ын 100,101 жилийн ойн баяр наадамд улсын харцага Н.Золбоогоор долоо давж “Улсын заан” цолыг хүртсэн.  

Монгол Улсын харцага Ш.Мөнгөнбаатар:

2011 оны Туулай жилийн сар шинийн баярыг угтсан “Атар” хэвийн боовны нэрэмжит барилдаанд  Аймгийн хурц арслан Ш.Мөнгөнбаатар үзүүрлэсэн. Улмаар 2018 онд АХ-ын 97 жилийн ойн баяр наадамд улсын харцага А.Цацабшираар зургаа давж “Улсын харцага” цол хүртсэн байна.

Иймд аймаг, цэргийн цолтой бөхчүүд “Атар” хэвийн боовны нэрэмжит “Оны анхны” барилдаанаар тухайн жилийн өнгөө тодорхойлж, улсын цол хүртэнэ гэж бэлгэшээн амжилттай сайн барилдахыг эрмэлздэг.

Тус барилдаан энэ бямба гарагт буюу 2026 оны 01 дүгээр сарын 10-ны өдрийн 11:00 цагаас Монгол бөхийн өргөөнд зохион байгуулагдана.