Г.Занданшатар: Ус, дулааны үнэ тарифыг нэмэх асуудлыг эхний хагас жилдээ хөндөхгүй

​​​​​​​

Ерөнхий сайд Г.Занданшатар нийслэлийн болон 21 аймгийн засаг дарга, ИТХ-ын дарга нартай Төрийн ордонд уулзалт зохион байгуулж байна. 

Энэ үеэр ус, дулааны үнэ нэмэхтэй холбоотой асуудлаар мэдээлэл өглөө. 

Ерөнхий сайд Г.Занданшатар "Ус суваг, дулаантай холбоотой үнэ тариф бодитой байгаа асуудал юм. Улаанбаатар хотод ус түгээлтийн зардал 20 төгрөг байхад 1 төгрөгөөр өгөөд олон жил болсон. Эрчим хүчний үнийн асуудлыг байнга барьж явсаар байгаад хуримтлагдсан. Гэхдээ үүнийг нэг өдөр нэг амьсгаагаар шийдэх бололцоогүй. Нүүрсний үнэ унаж байгаа энэ эмзэг үед суурь юмны үнэ нэмэхээр инфляцад нөлөөлөөд ард иргэдийн амьжиргаанд нөлөөлнө.

Эрчим хүчний үнэ өссөнийг далимдуулаад бараа бүтээгдэхүүнийг 3-4 дахин нэмэгдүүлсэн жишээ олон байна. Тиймээс энэ жилийн хувьд үүнийг цэгцлэх зорилгоор шийдвэр гаргасан. Ус, бохир, дулааны асуудлыг үндсэн зарчмаар шийдвэрлэхээр ажиллаж байна. Гэхдээ эхний хагас жил үнэ тарифын асуудлыг хөндөх боломжгүй. Зохицуулалтын асуудлаар холбогдох яамд үүрэг өгсөн. 

Нэн ялангуяа эрчим хүч, Улаанбаатарын дулаан хоёр хүнд байна. Эрчим хүчний үнэ өслөө гэхэд орон нутаг, Улаанбаатар ч бай өртгийг бууруулах шаардлагатай. Эрчим хүч дээр либералчлал гэж ярьдаг, гэтэл уурхайгаас эхлээд бүх шатанд өртгийг нэмэгдүүлж буй авлигыг шинж чанартай олон асуудал өдөр бүр илэрч байна. 

Саяхан хүртэл эрчим хүчний салбарт 2-3 асуудал гарлаа. Үнийг нэмэхийн тулд эхлээд суурь өртгийг зөв тооцож, үр ашгийг нэмэгдүүлж байж ярихгүй бол болохгүй байна. Усны үнэ тарифыг ойрын үед судалж, ярилцахаар үүрэг өгсөн. Гэхдээ эхний хагас жилийн байдлаар үнэ нэмэгдүүлэх асуудлыг шийдэхгүй" гэв.