Б.Чойжилсүрэн: Би ажлаа хүлээлгэж өгөхөд өнөөдөр ч, маргааш ч бэлэн байна

УИХ-ын гишүүн, Эрчим Хүчний Сайд Б.Чойжилсүрэн сэтгүүлчдийн асуултанд хариулсныг сийрүүлэн хүргэж байна.

30 хоногийн дотор эрчим хүчний салбарын асуудлыг шийдэх боломжгүй. Засгийн газар тогтоолын төсөл санаачилсан. Холбогдох сайд нарт танилцуулсан. Одоо эрчим хүчний салбар өөрийн хүчээр үүссэн нөхцөл байдлаас гарч чадахгүй. Засгийн газар, УИХ-аас дэмжлэг авч байж л шийдэж чадна.

-Таныг ажлаа хүлээлгэж өг гэвэл

Бэлэн байна. Өнөөдөр ч бэлэн, маргааш ч бэлэн. Би анхнаасаа сайдын суудалтай зууралдахгүй гэдгээ илэрхийлж байсан.

-Сайд солигдсон ч салбарын асуудал шийдэгдэх үү?

Мэдэхгүй. Би ондоо хүний өмнөөс ярих нь утгагүй шүү дээ.

-30 хоногийн хугацаанд ямар ажил хийж гүйцэтсэн бэ?

Өвлийн оргил ачааллын үе дуусаагүй байна. Энэ асуудлуудыг чангаруулаад явж байна. Салбарын санхүү эдийн засаг хүндэрсэн байгаа. Тарифыг цаг тухайд нь өөрчилж шинэчилж чадаагүйгээс шалтгаалаад хүндрэлтэй асуудлууд бий. Магадгүй Засгийн газар дэмжээд, төсвийн тодотгол хийж УИХ-аар баталбал энэ асуудал шийдэгдэх болов уу гэсэн байр суурьтай байна.

-Ө.Шижир гишүүн Засгийн газарт Т.Доржханд болон таныг огцруулах тухай саналаа хүргүүлсэн. Энэ талаар таныг Засгийн газраас дуудаж уулзсан уу. Ө.Шижир гишүүтэй уулзсан уу?

Би Шижир гишүүнтэй уулзаагүй. Уулзаад ч яах вэ. Сөрөг хүчин мэдээж цахилгаан хязгаарласан, иргэд бухимдалтай байгаа үеийг ашиглах нь зөв шүү дээ. Буруутгахгүй байгаа.

-Дахин цахилгаан хязгаарлах уу?

Чадлын дутагдлаас шалтгаалж хязгаарлах асуудал байхгүй. Цахилгаан дамжуулах агаарын шугам, хуваарилах байгууламжууд насжилт нь хоёр дахин хэтэрчихсэн. Нийт шугамын 54 хувийн ашиглалтын хугацаа дууссан. Тиймээс хааяа нэг газар саатал гарахыг үгүйсгэхгүй.

-Хэрвээ таныг сайдаас чөлөөлөхгүй бүрэн эрхийн хугацаагаа дуусга гэвэл та хийж чадах уу?

Засгийн газрын тогтоолын төсөл боловсруулаад холбогдох сайдуудад танилцуулаад явж байна. Энэ асуудал шийдэгдвэл эрчим хүчний асуудал жаахан гайгүй болох байх. Тэгэхгүйгээр бие дааж яг өнөөдрийн нөхцөл байдлаас гарахад төвөгтэй.

-Цагаан сарын үеэр хэрэглээ нэмэгдсэн байх. Эрсдэл үүссэн үү. Ачаалал хэр байв?

Цагаан сарын үеэр ямар нэгэн хязгаарлалт, саатал гараагүй. Цагаан сарын үеэр эсрэгээрээ ачаалал өсдөггүй, буурдаг юм шүү дээ. Жишээ нь, нэгдүгээр сарын 18-нд 1803 мвт цахилгаан өгч байсан бол цагаан сарын хамгийн оргил ачаалал 1610 мвт орчимд хүрсэн. Тиймээс ямар нэгэн тасалдал хязгаарлалт хийгдээгүй.