10 жилийн өмнөх хаврын чуулганы нээлт

Б.НЯМСҮРЭН

2026 оны УИХ-ын хаврын чуулган өчигдөр нээлтээ хийлээ. “Зууны мэдээ” сонин “Чөлөөт хэвлэл-нийгмийн ой санамж” булангаараа яг 10 жилийн өмнө буюу 2016 оны хаврын чуулганы нээлтийг хэрхэн сурвалжилж байсан тухай нийтлэлийг сануулж байна.

“Олонхгүй парламентын отгон чуулган эхэллээ” нийтлэлийг манай сонины Улс төрийн албаны сэтгүүлч М.Ганцэцэг бичиж байжээ. 2012-2016 он бол сүүлийн 35 жилд хоёр удаа тохиосон олонхигүй парламентын он жилүүд байлаа. Аль нэг нам нь олонх бололгүй, хамтарсан Засгийн газар байгуулагдаж, Засгийн эрх ерөнхийдөө Ардчилсан намд төвлөрч байсныг санаж байна. Гэхдээ Гүйцэтгэх засаглалын бүтцэд МАН, МАХН, МҮАН, ИЗНН болон бие даагчдын төлөөлөл ажилласан юм. Харин 2016 он сонгуулийн жил байв. Тэр утгаараа хаврын чуулган сонгуулийн өнгө аясыг тодорхойлохуйц, багагүй хүлээлттэй байсан байж таарна. 2016 оны дөрөвдүгээр сарын 5-ны өдөр бол Их хурлын хаврын чуулганы нээлтэд ерөнхийлөгч асан Ц.Элбэгдорж оролцсон ч байр сууриа илэрхийлж үг хэлээгүй байна. Харин Их хурлын дарга асан З.Энхболд чуулганы нээлтийн үеэр Тавантолгойн асуудлыг тодотгож, ач холбогдол өгч байсныг түүний хэлсэн үгнээс харагдаж байна. Тэрээр “Одоогоос яг нэг жилийн өмнө энэ танхимд УИХ-ын чуулганы нээлт дээр Тавантолгойн ордыг ашиглах хөрөнгө оруулалтын гэрээ Монгол Улсын эрх ашигт нийцээгүй тухай, энэ гэрээг УИХ-аар хэлэлцэн шийдвэрлэх нь зүйтэй гэдэг байр сууриа илэрхийлсэн”. “…Тавантолгойн ордыг ашиглах “Эрдэнэс Тавантолгой” компанид хувьцаа эзэмшиж байгаа Монгол Улсын 2,5 сая иргэн, дотоодын 553 аж ахуйн нэгжийн хувьцааг үнэгүйдүүлсэн, тэдний ашиг сонирхол, эрх ашгийг зөрчсөн гэрээг хүлээн зөвшөөрөх боломжгүй гэдгийг ч дахин хэлье. Хэрэв Тавантолгойн ордыг ашиглах энэхүү хууль зөрчсөн гэрээг зогсоогоогүй бол ард түмний өмч болон Тавантолгойн орд өнөөдөр гадны компанид бүрэн шилжих байлаа. Энэ бүхнээс харахад УИХ-ын шийдвэр нэг жилийн цаадахыг харж чадсан, улмаар хэдэн арван жилийн дараах Монголын эрх ашгийг дээдэлсэн шийдвэр байж чадсан” гэжээ.

Парламентын спикер байхдаа алхаа ширүүхэн тогшдог, хэдэн гишүүдээ багагүй загначихдагаараа алдартай байсан З.Энхболд дарга хаврын чуулганы нээлт дээр ч хатуухан байр сууриа илэрхийлж байсан нь ийнхүү сонины шарласан хуудаснаа үлджээ.

Эх сурвалж: “Зууны мэдээ” сонин

2026 ОНЫ ГУРАВДУГААР САРЫН 17. МЯГМАР ГАРАГ. № 49 (7791)