ТАНИЛЦ: Мөнгөн аягаа тамгаар сольсон НИТХ-ын дарга Д.Ихбаярын ХОМ

Өнгөрөгч баасан гаригт НИТХ-ын даргаар Д.Ихбаярыг томилох ээлжит бус хуралдаан болсон билээ. Үүнээс өмнө МАН-ын Удирдах зөвлөл хуралдаж, Д.Ихбаярыг НИТХ-ын даргад дэмжсэн байлаа. Тэгвэл өдгөө НИТХ-ын даргаар ажиллах албаа хүлээн авсан ч тамгагүй байсан юм. 

Тэрээр тус ээлжит бус хуралдаанаар 94.44 хувийн саналаар тус даргын суудалд залрахаар болсон. Гэвч НИТХ-ын даргын ажлыг хуралдаан түр даргалагч Ж.Батбаясгалан Д.Ихбаярт хүлээлгэн өгөхдөө хадаг, сүү барьсан. Ийнхүү тамгагүй байсан тэрээр өнөөдөр албан ёсны тамгаа хүлээн авахаар болжээ. 

Энэ талаар НИТХ-ын дарга асан А.Баяр "Намын бодлого, даалгавраар журмын нөхөр Д.Ихбаярт НИТХ-ын даргын үүрэгт ажлаа хүлээлгэн өгч байгаагаа мэдэгдэж байна. Найздаа цаашдынх нь ажилд өндөр амжилтыг хүсэн ерөөе. Хулгайч гэж хулгай хийсэн хүнийг хэлэх болохоос ажлаа шударгаар хийж байгаа хүмүүсийг хэлээгүй.

Цаашид эрхэм журмын нөхөдтэйгөө олон ажлыг хамтран хийж, найзалж нөхөрлөн, нийслэлийн иргэдийнхээ төлөө ажиллана. Энэ хугацаанд хоёргүй сэтгэлээр хамтарч ажилласан бүх хүнд чин сэтгэлийн талархал илэрхийлье. Нийслэлд бүтээн байгуулалт, мега төслүүд хэрэгтэй ч мега хулгай хийж ард иргэдээ тонож болохгүй. Миний хувьд цаашид төлөөлөгчийн хувиар үгээ хэлж, үзэл бодлоо илэрхийлсээр байх болно" гэлээ.

Д.Ихбаярыг улс төрийн хүрээнийхэн Ерөнхий сайд Н.Учралын дотны найз бөгөөд энэ хүрээллээрээ улс төрд орж ирсэн гэлцдэг.

Түүний хамгийн сүүлд буюу 2024 онд мэдүүлсэн ХОМ-тэй танилц:

• Өөрийн орлого: 10 сая
• Гэр бүлийн орлого : 132 сая
• Орон сууцгүй
• Lexus, NX 350- 1, Toyota, Alphart- 1: 168 сая
• Үхэр-80, Хонь-110, Адуу-60, Ямаа-19: 163 сая
• Газар: 5 сая
• Үнэт эдлэл: 10 сая
• Авлага: 817 сая
• Зээл: 25 сая
• Ногоон констракшн ХХК, Эрдэнэс таван толгой ХК-д хувьцаа эзэмшдэг хэмээн мэдүүлжээ.

Боловсрол:

• 2002-2006 онд МУИС-ийн МХСС-ийг Монгол хэл, япон хэл орон судлаач /БАКАЛАВР/
• 2011-2013 онд Хүмүүнлэгийн ухааны их сургуулийн Хэл шинжлэл /МАГИСТР/
• 2012-2015 онд "Их засаг" их сургуулийг Эрх зүйч

Ажлын туршлага:

• 2008-2009 онд "Их засаг" олон улсын их сургуульд Гадаад харилцааны мэргэжилтэн
• 2009-2013 онд "Их засаг" олон улсын их сургуулийн Лицей сургуулийн захирал
• 2013-2014 онд Баянгол дүүргийн ЗДТГ-ын ГБХЗХХ-ийн дарга
• 2014-2016 онд Баянгол дүүргийн ЗДТГ, ЖДҮДТ-ийн дарга
• 2016-2018 онд Сонгинохайран дүүргийн ЗДТГ-ын ХХҮХ-ийн дарга
• 2020-2024 НИТХ-ын Төлөөлөгч, Нийслэлийн МАН-ын Бүлгийн дарга
• 2024 оноос НИТХ-ын Төлөөлөгч