"Энэ зун баруун аймгуудаар хэт халж, төв болон зүүн бүсээр аадар бороо орно"

Энэ зуны цаг агаарын ерөнхий төлөв байдал, гол мөрний усны түвшин болон байгалийн болзошгүй эрсдэлийн талаар Ус цаг уур, орчны судалгаа мэдээллийн хүрээлэнгийн Хиймэл оюун ухаан, тоон загварчлал судалгааны хэлтсийн мэргэжилтэн Б.Жаргалангаас тодрууллаа.

- Энэ зуны цаг агаарын ерөнхий төлөв ямар байна вэ. Олон жилийн дундажтай харьцуулахад хур тунадасны хэмжээ ямар байна вэ?

- Зуны саруудын агаарын температур болон хур тунадасны хэмжээ бүс нутгуудаар харилцан адилгүй байна. Тухайлбал, зургаа болон долоодугаар сард Дорнод, Сүхбаатар, Дорноговь, Өмнөговь болон Хэнтийн зүүн хэсгээр олон жилийн дунджийн орчим, харин бусад нутгаар дунджаас дулаан байх төлөвтэй.

Хур тунадасны хувьд баруун аймгуудаар Баян-Өлгий, Увс, Ховд, Завхан, Говь-Алтайд дунджаас бага, говийн бүсийн зүүн болон өмнөд хэсгээр дунджаас ахиу, бусад нутгаар дунджийн орчим байна.

 Наймдугаар сард Өмнөговь, Дорноговийн ихэнх хэсгээр олон жилийн дунджийн орчим, бусад нутгаар дунджаас дулаан байна. Хур тунадас баруун аймгуудаар үргэлжлэн дунджаас бага байх бол говь болон зүүн аймгуудын нутгаар дунджаас ахиу орох төлөв гарсан.

- Сүүлийн үед богино хугацаанд аадар бороо, аянга цахилгаан зэрэг гэнэтийн үзэгдэл ихэссэн. Энэ зун үер усны аюул аль бүс нутагт илүү байна вэ. Гол мөрний усны түвшин ямар байх бол?

 - Энэ зун ч гамшигт үзэгдэл ажиглагдах магадлал өндөр байна. Ялангуяа төв болон зүүн аймгуудын нутгаар буюу Сэлэнгэ, Төв, Хэнтийд хүчтэй аадар бороо орох, голын усны түвшин нэмэгдэх эрсдэлтэй.

Зургаадугаар сард ихэнх гол мөрний усны түвшин олон жилийн дунджийн орчим буюу түүнээс бага байх ч Ховд гол болон Сэлэнгэ мөрний уртын дагууд усны түвшин дунджаас 5–60 см ахиу байна. Энэ сард хур борооны эрчимжлээс шалтгаалан богино хугацаанд уруйн үер, хур борооны үер үүсэх эрсдэл өндөр байгаа тул гол мөрөн, хуурай сайр, гуу жалга даган нутаглаж буй малчид, ард иргэдийг сонор сэрэмжтэй байхыг анхааруулж байна.