Хүүхэлдэйн театр 77 жилийнхээ түүхэнд анх удаа бүрэн хэмжээний хүүхэлдэйн кино бүтээлээ

Монгол Улсын Хүүхэлдэйн театрын 2025 оны хамгийн анхны шинэ уран бүтээл болох “Пөөдөө” бүрэн хэмжээний хүүхэлдэйн уран сайхны кино нь бүх насныханд зориулсан, Монголын анхны puppet movie буюу биет хүүхэлдэйн кино гэдгээрээ онцлогтой.

Энэхүү бүтээл маргааш буюу дөрөвдүгээр сарын 18-ны өдөр орон даяар нээлтээ хийх гэж байна.

Хүүхэлдэйн театрын дарга Б.Баянзул:

-Манай театр 1948 онд байгуулагдсан бөгөөд Монгол Улсад хүүхдэд зориулсан цорын ганц мэргэжлийн уран бүтээлийн байгууллага юм. Өнгөрсөн жил бид анх удаа орон тоогоо 10-аар нэмэгдүүлж чадсан. Хүүхдүүд цахим хэрэглээнд хэт автаж, гадаад соёлд уусаж байгаа талаар шүүмжлэл их байдаг. “Пөөдөө” УСК-ны гол зорилго нь үндэсний баатруудыг бүтээж, хүүхэд залууст эх орноо хайрлах, монгол хүний төлөвшлийг төлөвшүүлэх сургаалыг хүргэхэд оршиж байна. Уг киноны ажлыг 2021 оноос эхлүүлсэн.

Ерөнхий найруулагч Б.Батзориг:

-Хүүхэлдэй урлаг бол эртний урлаг. Хүн төрөлхтөн онгон шүтээн хэлбэрээр эхлүүлж, дараа нь урлаг болон хөгжсөн. “Пөөдөө” киног бүтээхдээ бид биет хүүхэлдэйнүүдийг жүжигчдээр хөдөлгөж, гүн хэсгүүдийг компьютер графиктай хослуулан хийсэн. Энэ төрлийн бүтээл дэлхийн 30 гаруй улсад хийгдэж байсан жишээтэй. Бэлтгэл ажилд 8 сар, зураг авалтад 44 хоног, компьютер графикт 1–2 жил зарцуулсан. Нийтдээ 4–5 жилийн хугацаанд олон хүн, маш их хөдөлмөр орсон бүтээл болсон. Энэ төрлийн уран бүтээл маш ховор тул төр, хувийн хэвшлийн байгууллагууд дэмжин анхаараасай гэж хүсэж байна.

Найруулагч Н.Ариунаа:

–Хүүхэлдэйн театр 77 жилийнхээ түүхэнд анх удаа бүрэн хэмжээний хүүхэлдэйн кино бүтээж буйдаа бид маш их баяртай байна. Нэг хүүхэлдэйг хөдөлгөхийн тулд гурван жүжигчин зэрэг ажилласан. Хүүхэлдэй урлаг нарийн мэдрэмж, тэвчээр шаарддаг онцгой урлаг. Энэ бүтээлд ажилласан уран бүтээлчид, баг хамт олондоо талархал илэрхийлье.