Эцэг эхчүүд хүүхдээ утаат тамхинаас гаргахын тулд электроныг хэрэглэхийг зөвшөөрч, бага ангийнхан хүртэл хэрэглэх болсон гэв

Эмч, багш нар, эцэг, эхчүүдийн төлөөлөл Тамхины хяналтын тухай хуулийн нэмэлт, өөрчлөлтийн төслийг УИХ-аар хэлэлцэж эхлэх болсонтой холбогдуулж хэвлэлийн бага хурал зохион байгууллаа. 

Энэ үеэр сурагчдын дунд электрон тамхины хэрэглээ нэмэгдэж байгаатай холбоотой мэдээллийг нийслэлийн Ерөнхий боловсролын 39 дүгээр сургуулийн нийгмийн ажилтан М.Батхишиг "Ерөнхий боловсролын сургуулийн орчинд өсвөр үеийнхэн электрон тамхийг түлхүү хэрэглэж байна. Электрон тамхи гарахаас өмнө янжуур тамхийг татдаг байсан. Харин одоо хүүхдүүд электрон тамхийг хаа дуртай газраа татдаг болжээ.

Зөвхөн өсвөр үеийнхний асуудал бус энэ төрлийн хэрэглээ бага ангийнхан руу ч чиглэж байна. Саяхан манай сургуулийн тавдугаар ангийн хүүхэд хүртэл vape буюу электрон тамхи барьчихсан явж байсан. "Ахаасаа авсан, ангийнхаа найзуудад амсуулж, үнэрлүүлж үзүүлэхийн тулд авчирсан" гэж хариулсан. 

Хэдийгээр бид сургалт хүмүүжлийн үйл ажиллагааг явуулж, сургалт орж, тодорхой шалгалтыг явуулдаг ч яг л баллуур, үзэгтэй адил хичээлийн нэг хэрэглэгдэхүүн мэтээр сурагчид цүнхэндээ авч явж байна. 

Бидний зүгээс эцэг эх, сурагчдад шаардлага тавьдаг ч эрх зүйн орчин алга. Электрон тамхи сургуулийн орчинд хориотой гэсэн хуулийн тодорхой зохицуулалтгүйгээс хүүхдүүдийн ирээдүй маш их эрсдэлд орж байгаа" гэлээ. 

Мөн Баянгол дүүргийн 40 дүгээр сургуулийн нийгмийн ажилтан "Хүүхдийн эрүүл аюулгүй байдалд анхаарах асуудал нийгмийн ажилтнуудын өмнө тулгардаг.

Сүүлийн жилүүдэд сургуулийн орчинд сурагчид электрон тамхи авчрах, татах явдал түгээмэл гарч байна. Үүнд багш, нийгмийн ажилтан болон эцэг эхчүүдийн зүгээс зохих арга хэмжээг авч ажиллаж байна.

Хүүхдүүдийн мэдлэг ойлголтыг дээшлүүлэх ёстой гэж үзээд электрон тамхины сургалтуудыг мэргэжлийн хүмүүстэй болон өөрсдөө эх сурвалжуудаас мэдээлэл авч хамтран сургалт бэлтгэсэн байдаг. 

Сургуулийн багш нар, үйлчилгээний ажилтнууд, эцэг эх, эргүүл жижүүрүүд энэ чиглэлд чухал үүрэг гүйцэтгэдэг. Мөн үе тэнгийн сургагч багш нарыг бэлтгэж 2023 оноос эхлээд үе шаттай сургалтуудыг явуулсан. Үүний үр дүнд 2025 онд дахин судалгаа хийхэд "мэддэггүй байсан хүүхдүүд маань зохих хэмжээгээр мэдээлэл"-тэй болсон.

Электрон тамхийг тамхи гэж үзэхгүй, утаанд нь хордож байгаа хүүхдүүд дам тамхидалтын талаар мэддэггүй байсан.

Харин сургалт нөлөөллийн ажлыг явуулсны хүчинд “Электрон тамхинаас болж хорддог юм байна” гэдгийг мэддэг болсон гэсэн үг" хэмээв. 

Энэ талаар "Сурагчдаас электрон тамхи илрүүлсэн бол хурааж аваад эцэг эхэд нь өгдөг. Ингэхдээ хор нөлөөг нь давхар зөвлөдөг. 

Гэтэл нэг хүүхдийн ээж “Манай хүүхэд утаат тамхи татдаг. Би хүүхдээ тамхинаас гаргахын тулд электрон тамхи авч өгсөн. Би өөрөө зөвшөөрсөн” гэж хэлсэн удаатай. 

Мөн нэг аав орж ирэхдээ энгэртээ электрон тамхи зүүчихсэн байсан. "Энэ чинь тамхи биш, тодорхой хуулийн зохицуулалт хаана байгаа вэ?

Бидний эрхэнд халдаад хурааж авах хууль зүйн зохицуулалт байхгүй" гэж хэлсэн.

Эндээс харахад электрон тамхийг зохицуулсан хууль зайлшгүй хэрэгтэй юм байна. Ингэснээр өсвөр насны хүүхдүүдийг тамхинаас гаргах, энэ төрлийн хэрэглээнд илүү хяналт тавих боломжтой.

Боловсролын байгууллагын зүгээс өөрсдийн хэм хэмжээнд олон арга хэмжээг авч хэрэгжүүлж байна. Цаашлаад эцэг эх, залуучуудын зүгээс энэ чиглэлд маш сайн ойлгож, тал талын арга хэмжээг авснаар хүүхдүүдийг электрон тамхинаас гаргах бүрэн боломжтой" гэлээ.