Дархан аварга А.Сүхбат 21 жилийн дараа сар шинийн бөхийн барилдааныг магнайлна

"Сүрээр дарагч" хэмээх гал морин жилийн Сар шинийн баярт зориулсан Улс, аймаг, цэрэг, сумын цолтой 256 бөхийн өнөөдөр 13:00 цагаас Монгол Бөхийн Өргөөнд эхэлнэ.

Уг барилдаанд зодоглохоор дархан аварга А.Сүхбат, Н.Батсуурь тэргүүтэй улсын цолтой 66 бөх бүртгүүлжээ. Тодруулбал дархан аварга хоёр, улсын аварга хоёр, улсын арслан зургаа, улсын гарди нэг, улсын заан 11, улсын харцага 16, улсын начин 28 бөх зодоглох аж.

Дархан аварга А.Сүхбатын хувьд хамгийн сүүлд 2005 оны бага наадамд зодоглож байв. Тухайн үед далай аварга цолтой явсан тэрбээр тавын даваанд улсын начин Ц.Сумъяабэйст өвдөг шороодсон түүхтэй. 

Дараа жилийнх нь улсын наадмын дараа зодог тайлсан "Жижиг" А.Сүхбат аварга 2014 онд Ерөнхийлөгчийн зарлигаар дархан аварга цол хүртсэн билээ.

Тэгвэл энэ удаагийн бага наадамд зодоглохоор бүртгүүлснээр дархан аварга цолтойгоо анх удаа барилдах юм. Хэрвээ бүртгүүлсэн бөхчүүд бүгд өргөөндөө барилдвал А.Сүхбат аварга залуу бөх А.Энхбаяртай эхний даваанд оноолтоор таарна.

Төв аймгийн Сэргэлэн сумын харьяат А.Сүхбат нь цагаан сарын барилдаанд хоёр түрүүлж, нэг үзүүрлэсэн амжилттай. Тухайлбал 1999 онд улсын заан цолтой байхдаа дархан аварга Б.Бат-Эрдэнийн 11 дараалсан түрүүг зогсоож байсан бол 2001 онд улсын арслан цолтойдоо өнгөлж, 2003 онд үзүүрлэж байв.

Сонирхуулахад, 1996 оноос хойш анх удаа хоёр дархан аварга цолтой бөх бага наадамд зодоглож байна.