Арга тасарсан нөхцөлд АН-ын дарга О.Цогтгэрэл Ерөнхийлөгчийн сонгуульд нэр дэвшиж магадгүй

Ардчилсан намаас Ерөнхийлөгчийн сонгуульд нэр дэвших магадлалтай хүмүүсээ нийгэмд таниулж байгаа. УИХ-ын гишүүн, АН-ын дарга, Ерөнхий сайд асан Н.Алтанхуяг, УИХ-ын гишүүн, АН-ын дарга, Шадар сайд асан Л.Гантөмөр, АН-ын дарга, УИХ-ын дарга асан З.Энхболд, ЗГХЭГ-ын дарга асан С.Баярцогт, УИХ-ын гишүүн, ХЗДХ-ийн сайд асан Х.Тэмүүжин гээд олон хүмүүсийн нэр энд бий.

Гэвч эдгээр нэр бүхий эрхмүүдийг нэг нэгээр нь нийгэмд муухай харагдуулах, нэр төрийг нь унагах кампанит ажил өрнөөд байна. Улс төрийн хэллэгээр бол бүгдийнх нь нүүрийг “баастаж” байна.

Н.Алтанхуягийг Хөгжлийн банкаар, Лу.Гантөмөрийг ахуйн хэргээр, мөн нөгөө шашин энээ тэрээгээр нь, З.Энхболдод нэг салдаггүй хэрэг тохчхоод чөдөрлөөд, Х.Тэмүүжинг цагдаагийн гүтгэлгийг нь бэлтгэчхээд анаад хүлээж байна.

С.Баярцогтыг бол Оюу толгойтой гэрээ хийсэн аймаар хүн гэж ард түмэнд бүүр цээжлүүлсэн бөгөөд дээрээс нь огт ор үндэсгүйгээр гарал үүслийнх нь тухай домог зохиожээ. Энэ бүгдээс харахад АН- аас нэр цэвэр хүн үлдээгүй бололтой. Ерөнхийлөгчийн сонгууль бол нэр алдартаа сүүдэр тусгасан хүн ард түмний дунд явж санал цуглуулах нь эргэлзээтэй болдгоороо онцлогтой. Бүх ард түмний саналын уралдаан болдог сонгууль. Тийм учраас ийм гүтгэлэг цаашид үргэлжлээд байвал дээрх хүмүүсийн хувьд бүх ард түмнээс сонгогдоно гэхэд эргэлзээтэй болж байна.

АН бүр болохгүй бол намын дарга О.Цогтгэрэлээ Ерөнхийлөгчийн сонгуульд сойх хувилбар байгаа гэнэ. УИХ-ын сонгуулиар нам ялбал Ерөнхий сайд болох хүн гэж үзэж байгаа ч Ерөнхийлөгчид “уячихад” болохгүй юм байхгүй гэцгээж байна.

Чухам өөрөө юу гэж үзэж байгааг хэн ч хэлж мэдэхгүй гэцгээх ч энэ талаар огт бодож үзээгүй гэж байхгүй гэсэн яриа бол бий. Тэр Увс аймгийн Тэс суманд 1976 оны 12 дугаар сарын 31-нд төрсөн гэсэн намтартай. Ер нь таньдаг хүмүүс нь түүнийг 1975 оны хүүхэд л дээ гэх нь ч байдаг.1976 оны хүүхэд гэхэд энэ жил 50 настай.

Ерөнхийлөгчийн сонгуулийн шинэчилсэн найруулагд бичсэнээр бол Монгол Улсын иргэн 50 нас хүрсэн бол Ерөнхийлөгчийн сонгуульд нэр дэвшиж болно гэсэн байдаг. Энэ жил 50 настай хүн ирэх жил 51 хүрнэ. Тэгэхлээр нэр дэвших насны болзлоо хангасан аж. Арга тасарсан нөхцөл байдал үүсвэл АН даргаа Ерөнхийлөгчийн сонгуульд нэр дэвшүүлж магадгүй.

Ө.Тулга

сонин.мн