БАЙР СУУРЬ: 1072 хувьцааны талаар иргэд юуг өгүүлэв

Өнөөдөр 1072 хувьцааны ноогдол ашгийг олгоно. 

Гүйцэтгэх захирлын үүргийг түр орлон гүйцэтгэгч Н.Цэрэнсамбуу: Эрдэнэс Тавантолгой ХК 2025 онд 30.3 сая тонн нүүрс олборлож, 28.7 сая тонн нүүрс борлуулсан. Нүүрсний үнэ сүүлийн зургаан жилээр авч үзэхэд хамгийн доод хэмжээнд нөхцөл байдал хүндрэлтэй байсан ч биет хэмжээ болон борлуулалтын хэмжээг бууруулахгүйгээр өөрсдийн зардлаа хэмнэх бодлого баримталж ажилласан. Үүний үр дүнд 1.1 их наяд төгрөгийн цэвэр ашигтай ажиллаж Компанийн тухай хуульд заасны дагуу ТУЗ-ийн шийдвэрээр хувьцаа эзэмшигчдэдээ ногдол ашиг хуваарилахаар болсон. Нэгж хувьцааг 65 төгрөгөөр тооцсон. 1072 хувьцаатай иргэд татварын дараах дүнгээр 63 мянга 242 төгрөг авна. Энэхүү мөнгийг энэ сарын 30-нд олгоно.

Манайх Эрдэнэс Монгол нэгдэлтэй хамтран нээлттэй компани болох ажлаа шат дараатайгаар хийж байна. Тухайлбал, Эрдэнэс Тавантолгой компанийн сүүлийн гурван жилийн санхүүгийн тайланд олон улсын хөндлөнгийн аутид оруулсан. Энэхүү ажлын явц 40 хувьтай үргэлжилж байна. Үүнийг ирэх зургадугаар сард дуусгахаар төлөвлөж байгаа. Нөгөө талд ордын нэгдсэн ТЭЗҮ-ийг батлуулах ажлаа эхлүүлж, Эрдэс баялгийн мэргэжлийн зөвлөлд хүргүүлсэн. Энэ сард ордын нэгдсэн ТЭЗҮ-ийг батлагдана. Эдгээр ажил дууссаны дараа хөрөнгийн болон бизнесийн үнэлгээг хийнэ. 1072 хувьцаатай иргэдийн нэгж хувьцааны нэрлэсэн үнэ 2012 оноос хойш өөрчлөгдөөгүй, 933 төгрөг хэвээр байгаа. Балансын үнэлгээгээр аваад үзэхэд энэ тоо хоёр дахин өсөх боломжтой. Үнэлгээ хийсний дараа нэгж хувьцааны үнэлгээг тогтоож байж нээлттэй болгох ажлыг ярих ёстой. Бидний зорилт бол энэ ондоо багтааж нээлттэй хувьцаат компани болох юм.

Нөгөөтээгүүр заавал ярих ёстой асуудал бий. Манай хөрөнгийн зах зээл жижигхэн. Монгол Улсын иргэдийн  ззэмшиж буй нийт гурван тэрбум хувьцаа хөрөнгийн зах зээл дээр нэг дор ороход хүндрэлтэй. Иймээс олон талаар тооцож нээлттэй болгох шаардлагатай.

Тэгвэл иргэдийн  1072 хувьцааны талаарх "БАЙР СУУРЬ"-ийг сонслоо. Ахмад настангуудын хувьд 1072 хувьцаагаа 1 сая төгрөгөөр зарсан гэгддэг. Харин 30-аас дээш насныханы зарим нь оюутан ахуй цагтаа сургалтын төлбөртөө суутгаж байсан зэргээс үүдэж хувьцаагүй хэмээж байлаа. Мөн хүүхдүүдийн 1072 хувьцааны ноогдол ашгийг эцэг эх нь захиран зарцуулдаг гэж ярилаа.