С.Наранцогт Монголбанкны ерөнхийлөгчөөр томилогдохын өмнөхөн 41 хэвлэлтэй ₮480 саяын гэрээ байгуулж, төсвөө хэтрүүлжээ

Төрийн өмчит "Эрдэнэс Монгол" ХК-ийн 2025 оны санхүүгийн аудитын дэлгэрэнгүй тайланг audit.mn дээр нээлттэй байршуулсан байна. "Эрдэнэс Монгол" нь төрийн өмчит уул уурхайн 15 компанийг нэгдсэн бодлого, стратегиар хангаж санхүүжилт авдаг.

2025 онд тус компани 62.2 тэрбум төгрөгийн зардалтай ажилласнаас 30.9 тэрбум төгрөг нь зөвхөн удирдлагын зардал байгаа юм. Тухайлбал 18.2 тэрбум төгрөгийг ажилчдын цалинд, нэг тэрбум төгрөгийг томилолтод, 904 сая төгрөгийг хурал зөвлөгөөн зохион байгуулахад, зар сурталчилгааны зардалд 534 сая төгрөг зарцуулсан байна. 

С.Наранцогт нь 2022-2025 онд "Эрдэнэс Монгол" ХК-ийн гүйцэтгэх захирлаар ажиллаж байсан бөгөөд 2025 онд арванхоёрдугаар сард Монголбанкны ерөнхийлөгчөөр томилогдсон. Тэрбээр шинэ албан тушаалд томилогдохынхоо өмнөхөн 41 хэвлэл мэдээллийн байгууллагатай 484.3 сая төгрөгийн гэрээ байгуулсан байна.

2025 онд 280 сая төгрөгөөр хэвлэл мэдээллийн байгууллагатай хамтарч ажиллахаар төлөвлөгөө батлуулсан боловч 200 сая төгрөгөөр хэтрүүлсэн гэдгийг аудитын байгууллага дүгнэлтдээ дурджээ. 2024 онд зар сурталчилгааны зардалд 413 сая төгрөг зарцуулж байсан байна. 

Шилэн данс дээрх мэдээллийг шүүж үзэхэд гэрээ байгуулсан гэх 41 хэвлэл мэдээллийн байгууллагаас зөвхөн дөрвийнх нь мэдээллийг оруулжээ. Тодруулбал хэвлэл мэдээллийн байгууллагуудтай хамтарч ажиллах, хамтын ажиллагааг хөгжүүлэх гэдэг нэрээр дөрвөн байгууллагатай тус бүр 9.8 сая төгрөгийн гэрээ байгуулсан тухай мэдээлэл байгаа юм. Бусад 37 байгууллагын мэдээлэл тодорхойгүй байна. 

Тиймээс хэвлэл мэдээллийн хэрэгслээр нийтлэх ажлын даалгаврыг боловсруулахдаа төсвийн тооцоолол хийлгүйгээр ерөнхий байдлаар боловсруулж гэрээний үнийн дүнг нийтлэг байдлаар тогтоосон, худалдан авах ажиллагааны төлөвлөгөөнд туссан нийт төсөвт өртгийн дүнгээс илүү дүнгээр гэрээ байгуулж, гүйцэтгэл гаргадаг зөрчлийг таслан зогсоох албан шаардлага хүргүүлсэн.

Мөн аудитын шалгалтаар  "Эрдэнэс Монгол" ХК-тай холбоотой нийт 43 тэрбум төгрөгийн 27 зөрчил илэрсэнд, 69.9 сая төгрөгийн зөрчилд хоёр төлбөрийн акт тогтоож, 40.9 тэрбум төгрөгийн зөрчилд 13 албан шаардлага, 1 хариуцлага тооцуулах албан шаардлага хүргүүлж, 2.9 тэрбум төгрөгийн зөрчилд 11 зөвлөмж өгчээ.