МЭК-ийн судалгаа Х.Нямбаатар дээр үнэмшилгүй байлаа...

Монголд байдаг судалгааны 50 гаруй байгууллагын нэг нь МЭК. Энэ байгууллага бусдаа бодвол харьцангуй идэвхтэй, ажиллагаа сайтай.

Гэсэн нь: МЭК биш болоод явчихлаа. тавдугаар сарынх нь судалгааны дүн гарч. Тэр дунд нэг ангилал байна. Үйл ажиллагаа нь таалагддаггүй улстөрчид буюу хамгийн муу улстөрч гэсэн утгатай ангилал. Асуулт нь: Та үйл ажиллагаа нь таалагддаггүй гурав хүртэлх улстөрчийг нэрлэнэ үү гэж. Тэрэнд нь Хотын дарга асан Х.Нямбаатар -19 оноо авч түрүүлсэн байна. Ухрааж үзэх нь ээ: Х.Нямбаатарын түрүүлсэн энэ ангилалд унасан улстөрчид бичигддэг болоод нэг жил өнгөрч байгаа юм байна.

Л.Оюун-Эрдэнийг Ерөнхий сайдаас огцорсон 25 оны 5 дугаар сард яг энэ ангиллын судалгаагаа хийгээгүй, оронд нь дараагийн Ерөнхий сайдад боломжтой улстөрчийг шууд тодруулж байж. Гэлээ гэхдээ тэрнээс хойших хэдэн сарын туршид Л.Оюун-Эрдэнийг хамгийн муу улстөрчийн жагсаалтын цээжинд давхиулсан байна. Цаашаагаа: 10 сард Д.Амарбаясгаланг УИХ-ын даргаас унахад үйл ажиллагаа нь таалагддаггүй буюу хамгийн муу улстөрчөөр зарлаж байж.

Гэлээ гэхдээ: Өнгөрөгч нэг жилийн турш нэг л хүний нэр хүнд сайн байгаа төдийгүй тогтмол өсч. Тэр нь Ерөнхийлөгч. Ерөнхийлөгчийн үнэлгээ 25 оны 6 дугаар сард 5.6 оноотой байснаа тогтмол өссөөр 26 оны 5 дугаар сард 6.6 оноотой болжээ. Гэтэл нь: нэг сонин юм сонстов. Судалгааны бусад байгууллагын дүн таг эсрэгээрээ болчихоод байгааг улстөрийнхэн яриад л байгаа.

Базах нь ээ: МЭК-ийн судалгааны тухай сүүлийн үест сайнаар ярихаа болиод байгааг зориуд тэмдэглэмээр. Гол үйлчлүүлдэг салбарынхан нь буюу улс төрийнхөн таагүй сэтгэгдэлтэй болж байгааг сонсгомоор. Тэд нар: Судалгааны байгууллага төлбөр авч болно. Гэвчиг захиалгат санал асуулга зарлах нь нийт судалгаанд итгэх итгэлтийг задалдаг гээд байх болж. Ерөөс: Судалгааны байгууллагад итгэх олон нийтийн итгэл нь 1-т: Тухайн байгууллагын хараат бус байдал буюу улс төр, бизнесийн аль нэг бүлэгт үйлчлэхгүйгээр зөвхөн үнэн бодит үр дүнг нууцлалгүйгээр олон нийтэд мэдээлэх, 2-т: Арга зүйн ил тод байдал буюу хэрэглэсэн аргачлал, түүвэрлэлтийн чанар болон тоо баримтын үнэн зөв байдал нь эргэлзээ төрүүлэхгүй байх, 3-т: Мэргэжлийн ёс зүй буюу мэдээллийг мушгин гуйвуулахгүй байх, олон нийтийн эрх ашгийг дээдлэх зарчмаа хэрхэн баримталж байгаагаа шууд хамаардаг юм байна.

Тиймийн учраас судалгааны байгууллагуудтай холбоотой датаг судалж, эд нарт итгэж болох уу, үгүй юу гэдгийг тооцохыг оролдов.

Үзэх нь ээ: Монгол Улс дахь судалгааны байгууллагуудад бүхэлд нь шууд итгэх, эсхүл эргэлзэх боломжгүй нь. Жанцан нь: Судалгааны байгууллагуудын үүсгэн байгуулагдсан суурь, санхүүжилт болон аргачлал нь хоорондоо тэс өөр, тэрүүгээрээ найдвартай байдал нь харилцан адилгүй. Гэлээ гэхдээ: Мэргэшсэн, хараат бус судалгааны байгууллагууд гэвэл олон улсын стандарт, шинжлэх ухааны аргачлал ашигладаг Ирим, Эм-Эм-Си-Жей, Сант Марал зэрэг хувийн хэвшлийн болон төрийн бус байгууллагын статустай судалгааны байгууллагууд байдаг байна.

Харин: МЭК нь Монголын нийгэм, улс төр, намуудын чансааг тогтоох тандалт судалгааг тогтмол хийдэг, салбартаа танигдсан хувийн судалгааны байгууллагуудын нэг гэдгээрээ нэртэй юм байна. Гэлээ гэхдээ тэдний судалгаанд туйлын итгэлтэй хандаж болохгүй бөгөөд үр дүнг нь харьцуулж, шүүлтүүртэй хүлээж авах шаардлагатай гэдгийг хөндлөнгийн эксперт зөвлөж.

МЭК-ийн судалгааны аргачлалын эерэг талыг: Тогтмол байдал буюу нийгэм, улс төрийн нөхцөл байдлын тандалтыг сар бүр тасралтгүй хийж, үр дүнгээ олон нийтэд нээлттэй танилцуулдаг гэж. Басхүү: Тэд судалгаандаа квотчилсон санамсаргүй түүврийн аргачлалыг ашигладаг бөгөөд Улаанбаатар болон хөдөө орон нутгийг хамруулдаг гэж мэдээлдэг хэмээж.

МЭК-ийн сул тал нь гэхлээр: Захиалгат судалгаа хийдэг гэж хардагддаг. Ерөнхийдөө л Монголд үйл ажиллагаа явуулдаг хувийн судалгааны байгууллагууд улс төрийн намууд болон нөлөө бүхий улстөрчдийн захиалгаар ажиллах тохиолдол цөөнгүй байдаг л.

Гэвчиг: МЭК зарим судалгаагаа улс төрийн зорилготой, худал байж болзошгүй хэмээн хардагддаг. Хэвлэл мэдээллийн хэрэгслүүдээр хүртэл шүүмжлэгдэж байж.

5 сарын судалгаагаар Х.Нямбаатарын таалагддаггүй буюу хамгийн муу улстөрч гэсэн нь үнэмшил муутай болсон. Уулаасаа: Түүнийг Хотын даргаас унагасан нь, унасных нь дараа сошиалд байнга муулж байгаа нь улс төрийн шалтгаантай гэдгийг бүгдээрээ мэднэ. Ерөөс: МАН-ынхан бүтэн нэг жилийн турш Ерөнхий сайд, УИХ-ын дарга, Хотын даргыг ээлж дараалан унагаж эрх мэдлийг нэгээс нөгөөд шилжлүүлэх ажиллагаа явуулж байгаа. Энийг ярихаар эдүгээг Ерөнхий сайд Н.Учралаас эхлээд: Манай дотоод асуудал руу бүү ор гэж уурладаг.

Гэтэл нь: Х.Нямбаатар эдүгээ цаг үедээ улс төрийн өөр нам, үзэл баримтлалын зөрүүгээс үл хамааран нийтийн дэмжлэг авдаг цорын ганц улстөрч. Нарийндаа: Х.Нямбаатар шулуун, шийдэмгий ажилладаг нь улс төрийн болон хувь хүний үзэл бодол, үзэл баримтлалын зөрүүгээс үл шалтгаалан дэмжих үндэс болдог. Гудамжинд гараад гурван хүнээс асуухад хоёр нь дэмжинэ, тэр найдвартай.

Тиймийн учраас: МЭК-ийн судалгаагаар Х.Нямбаатарыг хамгийн муу улстөрч гэсэн нь үнэмшилгүй байлаа.

Тэгэхлээр: МЭК-ийн судалгааны дүнг Сант Марал зэрэг бусад хараат бус, урт хугацаанд ажилласан судалгааны төвүүдийн үр дүнтэй харьцуулж байж бодит дүр зургийг гаргаж байвал зөв болох нь…

Ө.БАТБИЛЭГ

ӨДРИЙН СОНИН