"ЭЕШ-ын төв болгон дээр эмч, сэтгэлзүйчид ажиллаж байна"

Монгол Улсын их, дээд сургуулиудад элсэгчдийн мэдлэг, чадварыг үнэлэх Элсэлтийн шалгалт өчигдөр (2026.06.25)  Монголын түүхийн хичээлээр эхэлсэн билээ. Энэ жилийн шалгалтыг улсын хэмжээнд нийт 55 шалгалтын байранд зохион байгуулж  байгаа бөгөөд 49,014 шалгуулагч бүртгүүлжээ.

Төрийн нарийн бичгийн дарга Т.Ням-Очир “Бид жил бүр хамгийн цөөн тооны шалгуулагч бүртгүүлдэг учир шалгалтад дасгах, мэдээллийг хүртээмжтэй байлгах зорилгоор Монголын түүхийн хичээлээр шалгалтыг эхлүүлдэг. Энэ жил улсын хэмжээнд Монголын түүхийн шалгалтад 1511 шалгуулагч, дараагийн  шалгалт болох Англи хэлний шалгалтад 31,717  бүртгүүлсэн. Боловсролын сайдын тушаалаар ЭЕШ-д дэмжлэг үзүүлэх шуурхай баг байгуулсан. Энэ багт ЦЕГ-ын замын хөдөлгөөний чиг үүрэг бүхий нэгж, тээврийн цагдаагийн алба, нийтийн тээвэр болон орон нутгийн байгууллагууд хамтран ажиллаж, шалгуулагчдад тулгамдаж болзошгүй асуудлыг шуурхай шийдвэрлэхээр ажиллаж байна. Мөн шалгалтын төв бүрд эрүүл мэндийн ажилтан, сэтгэл зүйч болон хэв журам хариуцсан алба хаагчид ажиллана” гэв.

Боловсролын үнэлгээний төвийн захирал Э.Цэрэнцоодол “ЭЕШ-ын зохион байгуулалтын ажил хоёрдугаар сарын 1-нээс эхэлдэг. Үүнээс хойш шалгалтын төвүүдийг бэлтгэх, хүний нөөцөө бүрдүүлэх, даалгавар боловсруулах зэрэг бүх ажлыг шат дараатай хийдэг. Энэ жилийн элсэлтийн шалгалтад улсын хэмжээнд 3588 багш, албан хаагч ажиллаж байгаа бөгөөд орон нутагт 1175, нийслэлд 1796 хүн үүрэг гүйцэтгэж байна. Шалгуулагчид шалгалтын байранд дор хаяж нэг цагийн өмнө ирж, өөрийн суудлаа олж, шалгалт эхлэхээс арван минутын өмнө бэлтгэлээ бүрэн хангах нь хамгийн чухал” хэмээн ярилаа.