БАЙР СУУРЬ: Элсэлтийн ерөнхий шалгалтын материал задарсан гэх асуудлаар хэн, хэн юуг өгүүлэв

2026 оны Элсэлтийн шалгалт өчигдөр /2026.06.25/ түүх, англи хэлний шалгалтаар эхэлсэн бол өнөөдөр хими, газар зүй, нийгэм судлал зэрэг шалгалтаар үргэлжилж байна. 

Элсэлтийн шалгалтын явц болон олон нийтийн дунд үүсээд буй шалгалтын материал задарсан гэх асуудлын талаар Боловсролын сайд болон холбогдох албан тушаалтнуудаас тодрууллаа. Ингээд тэдний "БАЙР СУУРЬ"-ийг хүргэе.

Боловсролын сайд Л.Энх-Амгалан: Элсэлтийн ерөнхий шалгалт жил бүр зохион байгуулагддаг. Шалгалтын үнэлгээг хүлээн зөвшөөрөхгүй байх асуудал бол сүүлийн гурван жилд цэгцэрсэн. Аль болохоор бүх хүүхдэд хүртээмжтэй, шударга, цэгцтэй байх орчныг бид бүрдүүлээд л байгаа. Төрийн нарийн бичгийн даргаар ахлуулсан аймаг, дүүрэг, боловсролын дарга нарыг оролцуулсан онцгой комисс ажиллуулж байгаа нь энэ жилийн шалгалтын онцлог. Учир нь элсэлтийн ерөнхий шалгалтыг 55 төв дээр зохион байгуулж буй. Тухайлбал, сэдэв даалгарыг хийхэд Тагнуулын цагдаагийн хяналтад дор боловсруулагдаад шалгалтын өглөө л шалгуулагч хүүхдүүдийн өмнө лацыг нь задалдаг. Сошиалд гараад байгаа асуудал бол ор үндэслэлгүй. Үнэхээр боловсролын үнэлгээний төвийн ажилтан нь 2,5 сая төгрөгөөр зарсан бол цагдаагийн байгууллагад өгөх хэрэгтэй. Би өчигдөр шалгалтын төв дээр өөрийн биеэр очиж танилцсан. Сонгуулийн хар машин шиг хардаж сэрдээд байх зүйл байхгүй. Бүхий л зүйл нь цахимжсан. Орон нутгийн материалуудыг тагнуул, цагдаагаас бүрдсэн багийнхан хүргэдэг. Тэрнээс хэн нэгэн ажилтны цүнхэнд явж байдаг зүйл ерөөсөө биш. Би үүнийг сайдын хувиар хатуухан хэлье. 

Боловсролын яамны Ерөнхий боловсролын бодлого зохицуулалтын газрын дарга Л.Ганбат: Өчигдөр эхэлсэн Элсэлтийн шалгалтын түүхийн шалгалтад улсын хэмжээнд 1320 шалгуулагч хамрагдаж, дүн оноо нь гарсан. Дүн оноог харахад улсын хэмжээнд хоёр шалгуулагч 800 оноо авсан байна. Харин англи хэлний шалгалтад улсын хэмжээнд 31619 шалгуулагч хамрагдсанаас нийт 36 шалгуулагч хамгийн өндөр оноо буюу 800 оноо авсан. Үүнийг аймаг, дүүргээр нь авч үзвэл нийслэлийн Баянзүрх дүүргийн найм, Хан-Уул дүүргийн зургаа, Баянгол дүүргийн тав, Сүхбаатар дүүргийн гурав, Сонгинохайрхан дүүргийн хоёр, Чингэлтэй дүүргийн нэг, өмнөх оны гурван шалгуулагч байна. Орон нутгаас Орхон аймгаас гурав, Завхан, Говьсүмбэр, Хөвсгөл, Дархан-Уул аймгаас тус бүр нэг шалгуулагч 800 оноо авсан байна.

Элсэлтийн шалгалтад орж буй шалгуулагчдын сэтгэл зүйн эмзэг байдалд тулгуурлан зарим нэг ашиг хонжоо хайсан этгээдүүд олон нийтийн цахим сүлжээнд буруу ташаа мэдээлэл түгээж байна. Тухайлбал, Элсэлтийн шалгалтын сэдэв даалгавар задарсан, худалдаж байна, тэдэн төгрөгөөр авсан, зарсан гэх буруу ташаа мэдээлэл тарааж байна. Элсэлтийн шалгалтын сэдэв даалгавар задрах ямар ч боломжгүй. 24 цагийн камер, холбогдох хууль хүчний байгууллагын мэргэжилтнүүдийн хатуу хяналтад сэдэв даалгавар боловсруулагдаж, шалгалт зохион байгуулагдах өдөртөө шалгалтын төвүүдэд хуулийн байгууллагын тусламжтай хүргэгддэг тул задрах ямар ч боломжгүй гэдгийг хариуцлагатайгаар хэлье. Иймд элсэлтийн шалгалтын шалгуулагчид, эцэг эх, асран хамгаалагч, багш, иргэд олон нийтэд хандаж хэлэхэд буруу ташаа мэдээлэлд автаж, сэтгэл санаа, санхүүгээрээ хохирохгүй байхыг онцгойлон анхаарах хэрэгтэй.

Боловсролын үнэлгээний төвийн захирлын үүргийг түр орлон гүйцэтгэгч Э.Цэрэнцоодол: Өчигдөр зохион байгуулсан түүхийн шалгалтын сэдэвт дэлхийн түүхтэй холбоотой асуулт орж ирсэн талаар шалгуулагчид асууж байна. Бид Элсэлтийн шалгалтын хичээл тус бүрийн агуулгын үндсэн чиглэл буюу блюпринтийг шалгалт зохион байгуулахаас өмнө олон нийтэд нээлттэй мэдээлдэг. Үүний дагуу энэ жилийн түүхийн шалгалтын блюпринтэд дэлхийн түүхүүдээс тодорхой хэмжээний агуулга ирнэ гэдгийг заасан байсан. Тиймээс энэ жилийн шалгалтад өгсөн блюпринтийн дагуу даалгаврууд орж ирсэн. Гэнэт шинэ агуулгаар шалгалт авсан зүйл байхгүй гэдгийг ойлгох хэрэгтэй. Бусад шалгалтууд ч блюпринтийн дагуу орж ирнэ.