ҮНЭ ХАНШ: Махны үнэ гурван сарын дотор 6-11 мянган төгрөгөөр нэмэгдэж, халуун чулуу атгаж хорхог, боодог идэх лөөлэй болов

Хавраас хойш махны үнэ тэнгэрт хадсан. Өнөөдөр ч үнийн өсөлт хэвээрээ байна. Тун удахгүй наадам болох гэж буй энэ үеэрээ халуун чулуу атгаж, хорхог боодог хийх гээд махны эрэлт нийлүүлэлт өсдөг. Харин энэхүү эрэлтээс үүсэж махны үнэ буурч магадгүй гэсэн хүлээлт иргэдийн дунд үүсжээ.

Өнгөрсөн долоо хоногт хүнсний өргөн хэрэглээний бараа бүтээгдэхүүний үнэ өмнөх 7 хоногоос 0.8 хувиар, өмнөх сараас 3.6 хувиар өссөн үзүүлэлттэй гарав.

•  Төмсний үнэ 4.2 хувь,
•  Луувангийн үнэ 2.3 хувь,
• Хонины ястай махны үнэ 1.6 хувь,
•  Үхрийн цул махны үнэ 1.3 хувиар тус тус өссөн байна.

Тэгвэл одоогоос гурван сарын өмнө хонины мах нэг килограмм нь 22 мянган төгрөг, үхрийн мах 27 мянган төгрөгийн үнэтэй байлаа. Харин өнөөдөр махны үнэ огцом өссөн буюу хонины мах 6000 төгрөг, үхрийн мах 11 мянган төгрөгөөр нэмэгджээ.

• 2022 онд нэг килограмм үхрийн мах 16 мянган төгрөг,
• 2023 онд 18,800 төгрөг,
• 2024 онд 20 мянган төгрөг,
• 2025 онд 23 мянган төгрөг байсан бол энэ оны гуравдугаар сараас эхлэн 37 мянган төгрөг болж махны үнэ тэнгэрт хадлаа.

Махны үнийг хөөрөгдөлд оруулсан эздийг бараг л олоод хариуцлага тооцох юм дээдсүүд яриад хоёр сарын нүүрийг үзэх нь ээ. Гэвч бодит байдал дээр өссөн үнэ нь буурах биш улам нэмэгдсээр юун нөгөө халуун чулуу атгаж хорхог боодог идэх. Махны үнэ асуусан залус уулга алдаж байна. Ахмадууд тэтгэврийн хэдээ маханд л өгдөг болсноо учирлав. Нэг сайд нь тахиа, шувууны мах хямд түүгээр хоолло гэж ард иргэдээ дорд үзсэн. Түүний хэлснээр нэг хэсэг нь тахианы мах авч хооллож үзсэн ч хоол болохгүй байна хэмээн ахмад настангууд яриа өгч байв.