ҮНЭ ХАНШ: Хонины мах килограмм нь 31500 бол үхрийн мах 42800 төгрөгт хүрчээ

Баяр наадмын өмнө махны үнэ, өргөн хэрэглээний зарим барааны үнэ өссөн талаар мэдээлсэн билээ. Тэгвэл Улаанбаатар хотод 2026 оны 7 дугаар сарын 20-ны байдлаар гол нэрийн зарим барааны үнэ өмнөх сараас 0.9 хувиар, өмнөх 14 хоногоос 0.5 хувиар тус тус өсжээ. 

Өдрөөс өдөрт өргөн хэрэглээний бараа бүтээгдэхүүний үнэ өсөж буй нь иргэдийн амжиргаанд ихээхэн нөлөөлж буй гэдэгтэй хэн ч маргахгүй. Засгийн газар 100 хоногийн ажлаа тайлагнах үеэр Хүнс, хөдөө аж ахуй, хөнгөн үйлдвэрийн сайд Ц.Идэрбат махны үнийг бууруулахаар тодорхой арга хэмжээ авч байгаа, наадмын дараанаас махны үнэ нэмэгдэхгүй, нийлүүлэлт асуудал үүсэхгүй хэмээн индер дээрээс амлаж байв. Уг нь монголчууд зуны дэлгэр цагт махаа хамгийн хямдаар иддэг ард түмэн. Гэхдээ энэ жилийн хувьд монголчууд махаа хамгийн өндөр үнээр буюу 43 мянган төгрөгөөр худалдан авч байна. 

Тодруулбал, хонины ястай мах нэг килограмм нь Барс, Шонхор, БЗД-ийн зах, Бөмбөгөр худалдааны төв, Хархорин захуудад 25-26 мянган төгрөгийн ханштай байгаа бол Сансар супермаркет 28480, Саруул зах 31800, Миний дэлгүүрт 27900, Номин супермаркет 27480, Макс супермаркет 31500, Имарт 27480 төгрөгийн ханштай байна. 

Харин үхрийн цул мах нэг килограмм нь БЗД-ийн зах, Шонхор, Хархорин захуудад 36-37 мянган төгрөг бол Бөмбөгөр худалдааны төвд 40 мянга, Саруул захад 42800 төгрөг, Барс захад 37500 төгрөг, Миний дэлгүүрт 38900 төгрөг, Номин супермаркет 38480 төгрөг, Их наяд худалдааны төвд 41800 төгрөгөөр тус тус худалдаалагдаж буй ажээ. 

БЗД-ийн захад адууны ястай мах 19 мянга 500, цул нь 21 мянга 500 төгрөг. Ямааны цул мах 27 мянга 750 төгрөгийн үнэтэй байна.

Өргөн хэрэглээний бараа бүтэгдээхүүний үнэ ирэх долоо хоногт дахин хэдэн хувиар өсөх нь дамжиггүй ээ. Учир нь АҮЭБЯ-наас долдугаар сарын 15-ны өдрөөс эхлэн АИ92 төрлийн автобензиний үнийг литр тутамд 250 төгрөгөөр нэмэгдүүлэх, дизель түлшний үнийг литр тутамд 150 төгрөгөөр бууруулж байна хэмээн баяр наадмын үеэр мэдэгдсэн. 

Манай улсад шатахууны үнэ нэмэгдэхээр дагаж өдөр тутмын хэрэглээний хүнсний үнэ өсчихдөг жамтай. Гэвч шатахууны үнэ буурсан ч өргөн хэрэглээний бараа бүтээгдэхүүний үнэ эргэн буурдаггүй бичигдээгүй хуультай. Эл хуулийг л халчихвал дагаад хөөсөрсөн үнэ буух нь ойлгомжтой юм.