Өмгөөлөгч Б.Оюунбилэг: "Урьхан" Б.Чинбат гэж хүн бизнес хамтрагчаа гүтгэж хууль хяналтын байгууллагаар шалгуулж, торны цаана суулгана гэх мэтээр дарамталдаг

Хамтарч ажиллах нэрээр бусдын бизнесийг дээрэмддэг, хөрөнгөлөг хурандаа нараар халхавчлан эрүүгийн хэрэгт шалгуулж, дарамталж буй явдлыг дэлгэнэ гэх агуулгатай хэвлэлийн хурал Монголньюс мэдээллийн төвд өнөөдөр боллоо.

Энэ тухай өмгөөлөгч Б.Оюунбилэг "Та бүхэн "Урьхан" Б.Чинбат гэж мэдэх байх. Уг нь хоолны бизнес эрхэлдэг байснаа сүүлийн үед уул уурхай руу орсон бизнес эрхлэгч бий. Энэ хүн миний мэдэхээр гурван ч удаа хамтрагчтай хууль хяналтын байгууллагаар явсан. Гэрээний үүргээ өөрөө зөрччихөөд хамтрагчаа хууль хяналтын байгууллагад өгч шалгуулдаг, хөрөнгөлөг хурандаа нараар өөрийгөө хүрээлүүлчхээд хууль хяналтын байгууллагыг гартаа оруулсан мэтээр яриад явж байдаг хүн бий. 

Б.Чинбат нь Хамтын эх булаг гэж компанитай 2020 оноос хойш хамтарч алтны уурхайд ажиллах гэрээ байгуулж, ашгаа 70/30-аар хуваарилахаар болсон. 2020 онд гэрээ байгуулаад, дундуур нь өөрчлөлт оруулсан, 2025 онд дахиж гэрээ байгуулсан. Энэ хугацаанд 400 гаруй кг алт олборлосон. Гэтэл хамтрагчаа гүтгэж хууль хяналтын байгууллагаар шалгуулж, дээр нь 2025 оны гэрээ цуцлагдсаны дараа дахиж гэрээ байгуулж хамтрахгүй бол торны цаана суулгана гэх мэтээр дарамталж, шахалт үзүүлсэн.

Хэвлэлийн хурлын зорилго нь бизнес эрхлэгчид хэнтэй хамтрахаа сайн судлах хэрэгтэй, хоёрдугаарт "Урьхан" Б.Чинбат нь хүнтэй хамтарч ажиллаж чаддаггүй хүн байна гэдгийг бизнес эрхлэгчид мэдэж аваасай гэж хүсэж байгаа. 

Мөн хууль хяналтын байгууллагууд хэргийг шалгахдаа прокурорын зөвшөөрөлтэй, хуульд заасан үндэслэл журмын дагуу шалгалтын ажиллагааг хиймээр байна. Хамтын эх булаг компанийн Булган аймгийн Бүрэгхангай дахь алтны лицензтэй уурхайд шалгалт хийгдэж байгаа. Ингэхдээ саяхан долоо хоногийн хугацаатай хоёр ч удаа хойшлуулшгүй ажиллагаа хийж байна гээд Эрүүгийн Цагдаагийн Газар, Булган аймгийн Цагдаагийн газар, Экологийн Цагдаагийн Алба прокурорын зөвшөөрөл авалгүйгээр ажиллагаа хийсэн. Үүн дээр тухайн байгууллагуудад холбогдох гомдлыг дээд шатны газарт нь өгсөн.

Хамтын эх булаг компанитай 2020 онд Чинбат нь өөрийн BCH Gold гэдэг компаниар гэрээ байгуулсан. 2020-2025 он дуустал 400 гаруй кг алт олборлосон. Сүүлийн 207 кг алт олборлосны АМНАТ төлөөгүй, компанийн нэр дээр алтаа зөвхөн Монголбанканд тушаахаар гэрээлсэн ч 207 кг алтаа тушаагаагүй. АМНАТ болон төлбөрүүдээ төлөөгүй хохиролд оруулчхаад хамтрагчаа буруутай мэтээр хууль хяналтын байгууллагад өгч шалгуулаад хоёр жил өнгөрсөн" гэлээ.