Ерөнхий сайд Н.Учрал хамаарал бүхий сургуульдаа “хувьсах зардал нэхээгүй” гэв

Өргөн бариад байгаа Төсвийн тодотголд “Гэрт ойрхон сургууль-хамгийн сайн сургууль” арга хэмжээний 14 тэрбум төгрөгийг хотхоны сургуулийн түрээст, 15 тэрбум төгрөгийг хотхоны сургуулийн анги танхимын ширээ сандал, тоног төхөөрөмж худалдан авахад зарцуулна. 18 тэрбум төгрөгийг төрөлжсөн ахлах сургуулиудад тоног төхөөрөмж авахад, 2.5 тэрбум төгрөгийг хувийн сургуулиудын хувьсах зардалд нэмж өгнө гэж заажээ.

Тэгвэл Ерөнхий сайд Н.Учралын хамаарал бүхий “Их засаг кинг” сургуульд төрөлжсөн ахлах сургуулиудын тоног төхөөрөмжийн зардлаас 3.5 тэрбум төгрөгийн санхүүжилт өгөхөөр тодотголд тусгасан талаар УИХ-ын гишүүн О.Саранчулуун мэдээлсэн нь шуугиан дэгдээгээд байна.

Мөн энэ асуудлаар УИХ дахь Өргөдлийн байнгын хорооны уржигдрын хурлын дараа Боловсролын яамны төрийн нарийн бичгийн дарга Т.Ням-Очир сэтгүүлчдийн асуултад хариулахдаа дурдсан. Тэрбээр "Их засаг, Шинэ санаа, Империал зэрэг сургууль хүсэлтээ өгсөн гэж мэдэгдсэн.

Харин өчигдөр Ерөнхий сайд Н.Учрал "Манай гэр бүлийн хамаарал бүхий сургууль ямар нэгэн хүсэлт гаргаагүй. Тийм нотлох баримт байхгүй. Ерөнхий сайд хүн ийм утгагүй юм хийнэ гэж байхгүй. Боловсролын яам өөрсдөө санхүүжилтээ нээлттэй ярих хэрэгтэй" гэсэн юм. Тэрбээр АТГ-ын үүдэнд тайлбар хийхдээ “УИХ-аар 2026 оны төсвийн тодотголыг хэлэлцэж байна. Төсвийн тодотголтой холбоотойгоор улстөржилт өрнөж байна. Манай ард иргэд намайг мэднэ, нуух хаах зүйл байхгүй. Нээлттэй ил тод байх зарчмын үүднээс мэдээллийг нягтлах хүсэлтийг Авлигатай тэмцэх газарт гаргалаа. Үнэн мөнийг тогтоох байх.

Манай гэр бүлийн зүгээс төсвөөс санхүүжилт шийдүүлэхээр ямар нэг хүсэлт өгөөгүй, сайд нарын хувьд бие биедээ төсөв хуваарилах асуудал яригдаагүй. Ерөнхий сайдын хамаарал бүхий сургуульд зардал шийдсэн гэсэн зүйл байхгүй, төсвийн хуулийг харж болно. Ерөнхий сайдын хувьд ийм үйлдэл хийх шаардлага байхгүй. Сонгинохайрхан дүүрэгт сургууль байгуулагдаад есдүгээр сарын 1-нээс 1-12 дугаар ангийн хүүхдүүд хичээллээд явж байгаа юм билээ. Миний хамаарал бүхий этгээдүүдээс төсвөөс санхүүжилт авах ямар ч хүсэлт тавиагүй гэсэн юм.

Тэр яригдаад байгаа хувьсах зардал гэж юуг хэлдэг вэ гэхээр :

Боловсролын ерөнхий хуулийн 3.1.16-д "хувьсах зардал" гэж сургуулийн өмнөх боловсрол, ерөнхий боловсрол, мэргэжлийн болон техникийн боловсролын сургалтын хөтөлбөрийг хэрэгжүүлэхэд шаардагдах нэг суралцагчид ногдох шууд болон шууд бус өртөгт суурилсан зардлын дундаж хэмжээг хэлнэ гэжээ.

Багшийн үндсэн цалин, түүнд ногдох нийгмийн болон эрүүл мэндийн даатгалын шимтгэл;

Багшийн нэмэгдэл, нэмэгдэл хөлс, түүнд ногдох нийгмийн болон эрүүл мэндийн даатгалын шимтгэл; Хичээл, сургалтын үйл ажиллагааны зардал; Захиргаа, аж ахуйн ажилтны орон тооны жишиг нормативаар тооцсон үндсэн цалин, түүнд ногдох ажил олгогчоос төлөх нийгмийн болон эрүүл мэндийн даатгалын шимтгэл; Захиргаа, аж ахуйн ажилтны нэмэгдэл, нэмэгдэл хөлс, түүнд ногдох нийгмийн болон эрүүл мэндийн даатгалын шимтгэл; Захиргаа, аж ахуйн ажилтны урамшуулал, түүнд ногдох нийгмийн болон эрүүл мэндийн даатгалын шимтгэл; Сургуулийн үйл ажиллагааны урсгал зардал, Багшийн хөгжлийн зардал; Эрүүл мэндийн үйлчилгээний зардал, Цахим хэрэглээний зардал; Анги танхимын ариутгал, цэвэрлэгээний зардал, Танхимаас гадуурх сургалтын үйл ажиллагааны зардал; Хүүхэд хамгааллын зардал; Тоног, төхөөрөмжийн нөхөн хангалтын зардал тус тус багтдаг байна.

Харин тэр “Их засаг кинг” дунд сургууль бол орчин үеийн шинэ сайхан сургууль байна лээ. Мөн хүүхдүүдийг төлбөртэй элсүүлдэг, бага ангийн сурагч найм, есөн сая төгрөгийн үнэтэй гэж дуулдсан. Дунд, ахлах анги нь бүр ч үнэтэй л байлгүй. Тийм төлбөртэй сургууль. Гэхдээ төлбөртэй сургууль байсан ч хүүхдэдээ гаргах зардлаа төр гаргадаг хуультай л даа. Ерөнхий сайд Н.Учрал “Бид хүсэлт тавиагүй” гэсэн нь байж болох л хувилбар. Яагаад гэвэл зардлаа өөрөө дааж чадах сургууль байгуулаа биз.

Ө.ТУЛГА

ӨДРИЙН СОНИН