Ардчилсан нам Засгийн газрыг огцруулна гэж байснаа гэнэт итгэл үзүүлнэ болоод явчихлаа. Үүнийг Засгийн газарт боломж олгож буй хэлбэр гэж сайхнаар тайлбарлаж байгаа.

Ард түмэн болон намын гишүүд нь эхлээд итгэл үзүүлэх эсэх тогтоол өргөн бариад л хэлэлцүүлээд, итгэл үзүүлэхгүй гээд улс төр болгоод сүйдлээд байх юм бодсон. Гэвч сэтгэлийн хөөрлөө дараад хууль юм нь юу байна гээд харцгаасан. Гэтэл Үндсэн хуулийн 44 дүгээр зүйлд

1.Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал Улсын Их Хурал гурав хоногийн дараа хэлэлцэж эхлэн арав хоногийн дотор Улсын Их Хурлын нийт гишүүний олонхын саналаар шийдвэрлэнэ.

2.Улсын Их Хурал тогтоолыг баталсан бол Ерөнхий сайдад итгэл үзүүлж, тухайн асуудлыг дэмжсэнд тооцно. Тогтоолыг батлаагүй бол Ерөнхий сайдыг огцорсонд тооцож, шинэ Ерөнхий сайдыг 30 хоногийн дотор томилно гэж заасныг уншицгаасан байлгүй.

Хуульд хоёргүй утгаар “Ерөнхий сайд улсын төсвийн болон бодлогын тодорхой асуудлаар өөрт нь итгэл хүлээлгэх тогтоолын төслийг оруулбал” гэж заажээ. Өөрөө л тэр тогтоолын төслийг оруулахгүй бол өөр хэн ч итгэл хүлээлгэх тогтоолыг оруулах эрх байхгүй аж. Тэгээд Ерөнхий сайдыг өөрийгөө боомилох тогтоолын төсөл УИХ-д оруулна гэж итгэх нь “гэнэн” гэх үү бараг “тэнэг” гэж үзэх үү. АН-ын УИХ-ын гишүүд Ерөнхий сайд Н.Учралыг “Залуу бага юм, гэнэдээд тогтоолын төсөл оруулчихна” гэж горьдоогүй л юм бол ийм үйлдэл хийх нь зүгээр л цаг барсан зүйл гэхээс өөр хэлэх зүйл алга. Яах вэ сайдыг өөрийнхөө хүзүүнд дүүжлэх олсоо углахгүй бол огцруулах бичиг өргөн барина гэж байгаа ч дэмжлэг авах эсэх нь маргаантай л юм.

МАН-ЫН ДОТОРХ ТОЛХИЛЦООН 30,38-ЫН БҮЛГИЙН ГЭХЭЭСЭЭ ИЛҮҮ ҮЕ ХООРОНДЫНХ БАЙХМАГАДЛАЛТАЙ

Эрх баригч МАН дотроо толхилцон зөрчил хөдөлгөөнтэй байна. Ерөнхий сайдын сургуулийн 3.5 тэрбум төгрөгийн хувьсах зардал, ХЗДХ-ийн сайд С.Амарсайхны удганы болон ШШГЕГ-ын даргаа дарамталсан гэх дуулиан зэргээс харагдана. Энэ бүгдээс харж байхад МАН-ын УИХ-ын гишүүд дотроо хоёр хуваагдсан. 30 болон 38 аараа салсан,тэд л намаа бужигнуулаад байна гэцгээж байгаа. Тэгвэл одоо нөгөө салан одсон гэх 30-ын бүлэг гэдэг нь юун 30 гишүүн, түүнээс ч олуулаа болж байгаа дуулддаг болсон. Гэхдээ энэ нам доторх үл ойлголцол дээрх бүлгүүдээс болж буй гэхээсээ үе хоорондын толхилцоон мэт харагддаг болоод удаж байгаа. МАН-д далаад оныхон, наяад оныхон, ерээд оныхон гэсэн үе улс төрд маш идэвхтэй байгаа. Төр засгийг энэ үеүд ээлжлэн барьж байгаа гэхэд хилсдэхгүй. Одоо бол ерээд оны залуу намын дарга ерөнхий сайд хийж байна. Ерээд оныхон төр барьж байгаа ч гэмээр юм уу. Монголд улс төрийн хоёр том сонгууль шил шилээ хараад хүлээж байна. 2027 оны ерөнхийлөгчийн сонгууль,2028 оны УИХ-ын сонгууль. Дал,наян оныхон ерээд оны залуугаас зөвшөөрөл авч байж эдгээр сонгуульд оролцох эрхтэй болно. Энэ нь дал, наян оныхны эгдүүг хүргээд байх шиг байна. Ер нь 2028 оны сонгууль хүртэл 80 аад оныхонд улс төрийн ямар ч амбиц байхгүй. Тэд засаг солигдсон ч шинэ засагт орох шанс бараг байхгүй. Тэгэхлээр далаад оныхны амбиц л Монголын улс төрийг бужигнуулаад байх шиг харагдаж байна. Л.Энх-Амгалан сайд яах гэж мартагдаж шахуу байсан сэдвийг гаргаж ирэн хэвлэлийн хурал хийв.

С.Амарсайхны хэрүүл, Б.Энхбаярын хэрүүлийн постууд гэх мэт. Энийг ч наяад оныхны төлөөлөл, 30 бүлгийн толгойлогч гэгдэх Ерөнхий сайд асан Л.Оюун-Эрдэнэ “Г.Занданшатар Б.Энхбаяраар хөлөө боолгож унасан. Одоо Н.Учрал хоолойгоо боолгож унаж магадгүй” гэснээс илт харагдана.

Д.НАЦАГ