Монгол Улсын иргэд бүлэглэн хар тамхи хилээр нэвтрүүлэхийг завджээ

Сүүлийн жилүүдэд хар тамхи, сэтгэцэд нөлөөт бодисыг улсын хилээр нэвтрүүлэх гэмт хэрэг өсөх хандлагатай байна.

Эл хууль бус үйлдлийг таслан зогсоох зорилгоор Цагдаагийн ерөнхий газрын Хар тамхитай тэмцэх алба, Гаалийн ерөнхий газар болон Тагнуулын ерөнхий газар хамтран хяналт шалгалт тогтмол зохион байгуулж байгаа юм.

Энэхүү хамтарсан хяналтын хүрээнд энэ оны хоёрдугаар сарын 10-ны шөнө улсын хилээр нэвтэрсэн ачаа тээвэрт үзлэг хийх явцад их хэмжээний мансууруулах бодис илрүүлжээ. Тодруулбал, Монгол Улсын гурван иргэн бүлэглэн, хууль бусаар ашиг олох зорилгоор хушганы самрын идээг авч, оронд нь "мөс" гэх нэршилтэй 628.5 грамм сэтгэцэд нөлөөт бодисыг нуун далдлах аргаар хилээр нэвтрүүлсэн байна. Хууль хяналтын байгууллагаас холбогдох этгээдүүдийг саатуулан, мөрдөн шалгах ажиллагааг үргэлжлүүлж байна.

Монгол Улсын Эрүүгийн хуулийн 20.7 дугаар зүйлд "Мансууруулах эм, сэтгэцэд нөлөөт бодисыг хууль бусаар ашиглах" гэмт хэргийг зохицуулдаг. Тодруулбал, Улсын Эрүүгийн хуулийн 20.7 дугаар зүйлийн нэгдэх хэсэгт хориглосон мансууруулах эм, сэтгэцэд нөлөөт бодис, тэдгээрийн түүхий эдийг худалдаалах зорилгогүйгээр хууль бусаар бэлтгэсэн, хадгалсан, бусдад өгсөн, олж авсан бол нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ гэж заасан байдаг.

Мөн мансууруулах бодистой холбоотой гэмт хэрэг нь маш хүнд ангилалд багтдаг бөгөөд Эрүүгийн хуулийн дагуу 14-өөс 16 хүртэлх насны өсвөр насны хүүхдүүд ч энэ зүйл заалтаар эрүүгийн хариуцлага хүлээхээр хуульчлагдсан байдаг.